mujh par tiri nazron ka jo ehsan nahin hota
hathon se mire chaak gareban nahin hota
ḳhali kabhi kanTon se gulistan nahin hota
kanTon se kabhi phuul pareshan nahin hota
kuchh dard ho kuchh soz ho kuchh nuur ho dil men
bas ḳhaak ka putla hi to insan nahin hota
ai dost samajhta huun tiri pursish-e-gham ko
baton se kabhi dard ka darman nahin hota
kyuun us ko mire chak-e-gareban ki ḳhabar ho
gesu bhi kabhi jis ka pareshan nahin hota
ai barq-e-jahan-soz tujhe ye bhi ḳhabar hai
ashiq ka nasheman kabhi viran nahin hota
har phuul ko dekhun ye hai avara-nigahi
har naqsh men to jalva-e-janan nahin hota
mamnun-e-karam ek zamana hai hamen kya
ham par to kabhi aap ka ehsan nahin hota
khulta hai koi raz-e-nihan dekh chaman men
ghunchon ka yunhi chaak gareban nahin hota
phulon se bahal ja.un vo divana nahin huun
kanTon se ulajhne ko to daman nahin hota
maujon ko bana leta huun main apna safina
tufan bhi mire samne tufan nahin hota
main jin pe fida huun vahi jalve hain nazar men
a.ina tujhe dekh ke hairan nahin hota
kis manzil-e-dushvar men huun ishq ki ‘arif’
un se bhi mire dard ka darman nahin hota
Leave a Reply