Tu Ab Ke Ajab Tarah Mila Hai

tū ab ke ajab tarah milā hai

chehra to vahī hai dil nayā hai

suntā hī nahīñ hai ek merī

dil tere mizāj par gayā hai

tanhā bhī nahīñ magar tire ba.ad

shāmoñ kā udaas silsila hai

palkoñ pe hai kuchh namī udhar bhī

dil aaj idhar bhī ro diyā hai

chamkā hai ye kaun jis ke aage

sūraj sā charāġh bujh gayā hai

fursat use ho to us se pūchhūñ

mere liye us kā hukm kyā hai

Leave a Comment