Guhar Khairabadi
toḌ kar shisha-e-dil ko mire barbad na kar
is tarah mujh pe sitam ai sitam-ijad na kar
ye nigah lutf ki hai is se na kar qatl mujhe
chashm-e-jan-baḳhsh ko yuun ḳhanjar-e-jallad na kar
ru-e-raushan ki kabhi diid mujhe bhi diide
rah ke poshida mujhe muztar-o-nashad na kar
tere hi dil ka agar gosha qafas hai sayyad
phir to hargiz mujhe is qaid se azad na kar
jab yahan sunta nahin teri fughan koi ‘guhar’
maslahat jaan ḳhamoshi hi men fariyad na kar
Leave a Reply