ḳhvab aaseb se ban nikle miri ankhon se
log aise to nahin Darte miri ankhon se
band TuuTa jo mire dil men basi aahon ka
phuuT nikle hain ka.i chashme miri ankhon se
raunaqen vasl ki phir hijr ki vahshat haa.e
tum ne dekhe hain kahan mele miri ankhon se
kitni ḳhushiyon se saja.e the tire ḳhvab magar
ab to raton ko hain vo rote miri ankhon se
dekhne vaala har ik shaḳhs yahi kahta hai
phuul sukhe bhi lagen achchhe miri ankhon se
ḳhud ko dekhun to tira aks nazar aata hai
kitne hone lage hain dhoke miri ankhon se
teri ‘iqra’ ke sabhi sher hain baten teri
tere qisse hi sada mahke miri ankhon se
Leave a Reply