gham-e-paiham ki zindagi bhi mili
gham men ik lazzat-e-ḳhafi bhi mili
umr nauha-kunan rahi saari
isi nauhe men naghmagi bhi mili
gharfashin shorishen guhar dahaḌ
isi jangal men simfani bhi mili
ghup andheron ki rahguzaron men
kabhi chhan-chhan ke chandni bhi mili
ik-na-ik rasta to sab ka hai
ye na puchho ki rasti bhi mili
yuun bhi kya kam the rah-zanan-e-havas
raah men bisvin sadi bhi mili
us andhere ka shukriya jis men
ham jo Duube to raushni bhi mili
ham ne mangi shaguftagi paa.i
be-talab phir fasurdagi bhi mili
umr-bhar qist qist marte rahe
mar chuke jab to zindagi bhi mili
Leave a Reply