Chala Hai O Dil-E-Rahat-Talab Kya Shadman Ho Kar

Poet

chala hai o dil-e-rahat-talab kya shadman ho kar

zamin-e-ku-e-janan ranj degi asman ho kar

kiya viran chaman ko aa.e ho kya bostan ho kar

hue gul paani paani ye chali ab-e-ravan ho kar

isi ḳhatir to qatl-e-ashiqan se man.a karte the

akele phir rahe ho yusuf-e-be-karvan ho kar

javab-e-nama kya laaya tan-e-be-jan men jaan aa.i

gaya yaan se kabutar vaan se aaya murgh-e-jan ho kar

ghazab hai ruuh se is jama-e-tan ka juda hona

libas-e-tang hai utrega aḳhir dhajjiyan ho kar

agar ahista bolun na-tavani kahti hai bas bas

sada-e-jumbish-e-lab dete hi sadme fughan ho kar

izar-e-atishin ḳhatt-e-siyah ik din nikalega

rula.ega ye sho.ala meri ankhon ka dhuan ho kar

mukaddar ho agar lo mujh ko gaaḌo is taraf dekho

ki zer-e-ḳhak huun gard-e-nigah se na-tavan ho kar

kiya ghairon ko qatl us ne mue ham rashk ke maare

ajal bhi dosto aa.i nasib-e-dushmanan ho kar

phira sad-chak ho kar kucha-e-kakul se dil apna

azizo yusuf-e-gum-gashta aaya karvan ho kar

kaman abru ki aise narm hai aa.ega jo navak

rahega ustuḳhvan men apne maghz-e-ustuḳhvan ho kar

chhuḌa.i chuus kar ham ne misi to kya hai sharmaya

lab us mahjub ka chhupne laga munh men zaban ho kar

falak meri tarah aḳhir tujhe bhi piis Dalega

uḌega ai huma ik roz gard-e-ustuḳhvan ho kar

huma se hai kaḌapan ai sag-e-janan jo tu khaa.e

mula.em ustuḳhvan ho jaa.en maghz-e-ustuḳhvan ho kar

jahan jo chahiye vaisi hi vo dikhla.e nairangi

basar ankhon men goya.i zaban men dil men jaan ho kar

sitam kar us ke ye dekhe to ḳhun-rezi pe maa.il ho

kare sang-e-malamat tez ḳhanjar ko fasan ho kar

nahane men jo lahrati hai zulf-e-yar dariya men

taḌapne lagti hain paani pe maujen machhliyan ho kar

udasi jhuk ke milte ho nigah se qatl karte ho

sitam-ijad ho navak lagate ho kaman ho kar

uTha.egi jo ham ko vahshat-e-dil yaar ke dar se

girenge pa.ezi paanv pe apne beḌiyan ho kar

kaha jo us ne chaha zo.af se yaan lab nahin milte

subuk kar deti hain harf-e-suḳhan bar-e-garan ho kar

asar baaqi raha balbe shab-e-furqat ki tariki

charagh-e-rose se sho.ala nikal aaya dhuan ho kar

ḳhat-e-nau-ḳhez men aariz jo tere chhupte jaate hain

pari ban ja.enge is sabz shishe men nihan ho kar

gira qadmon pe said-e-na-tavan tha haath se chhuT kar

jagah de ab to naqsh-e-pae-e-sayyad ashiyan ho kar

tire vahshi ko barson ai pari kab niind aati hai

agar ḳhvab-e-giran aaya bhi to sang-e-giran ho kar

‘vazir’ us ka huun main shagird jis ko kahte hain munsif

liya mulk-e-ma.ani badshah-e-sha.iran ho kar