Rahmaton Se Ghar Sajaane Mah-E-Ramazan Aa Gaya

rahmatoñ se ghar sajāne māh-e-ramazāñ aa gayā

sīdhe raste par chalāne māh-e-ramazāñ aa gayā

is kī raunaq aur bahāreñ dekhte haiñ chār-sū

bekalī aur dukh miTāne māh-e-ramazāñ aa gayā

roze kī barakat kā yaaro mājrā hī aur hai

ḳhair ke le kar ḳhazāne māh-e-ramazāñ aa gayā

gūñjtī haiñ har taraf qur.ān kī hī āyateñ

nekiyoñ meñ din bitāne māh-e-ramazāñ aa gayā

dil kī apnī sab murādeñ pyāre rab se maañg lo

khul ga.e rab ke ḳhazāne māh-e-ramazāñ aa gayā

masjideñ ābād haiñ phir mominoñ ke dam se yuuñ

rab ko apne phir manāne māh-e-ramazāñ aa gayā

dil ‘shagufta’ kā taḌap ke kah rahā hai aaj ye

ranj-o-ġham jī se bhulāne māh-e-ramazāñ aa gayā

Leave a Comment