Shagufta Shafiq
rahmaton se ghar sajane mah-e-ramazan aa gaya
sidhe raste par chalane mah-e-ramazan aa gaya
is ki raunaq aur baharen dekhte hain char-su
bekali aur dukh miTane mah-e-ramazan aa gaya
roze ki barakat ka yaaro majra hi aur hai
ḳhair ke le kar ḳhazane mah-e-ramazan aa gaya
gunjti hain har taraf qur.an ki hi ayaten
nekiyon men din bitane mah-e-ramazan aa gaya
dil ki apni sab muraden pyare rab se maang lo
khul ga.e rab ke ḳhazane mah-e-ramazan aa gaya
masjiden abad hain phir mominon ke dam se yuun
rab ko apne phir manane mah-e-ramazan aa gaya
dil ‘shagufta’ ka taḌap ke kah raha hai aaj ye
ranj-o-gham ji se bhulane mah-e-ramazan aa gaya
Leave a Reply