ye jo har harf mire lafz ka uljha hua hai
aise lagta hai kahin ḳhvab men socha hua hai
kya ye mumkin hai kisi roz use chuum sakun
mere mathe pe tira naam jo likkha hua hai
pis ga.e dard ki chakki ki silon men mire ḳhvab
aankh men niind nahin jism bhi TuuTa hua hai
aa.ina toḌ diya hai miri vahshat ne magar
mere kamre men koi mujh sa hi bikhra hua hai
ek din us ko utarunga varaq par ‘fa.ez’
ek manzar jo miri aankh men aTka hua hai
Leave a Reply