Yasmeen Hameed
daulat-e-dard sameto ki bikharne ko hai
raat ka akhiri lamha bhi guzarne ko hai
khisht-dar-khisht aqidat ne banaya jis ko
abr-e-azar usi ghar pe thaharne ko hai
kisht-e-barbad se tajdid-e-vafa kar dekho
ab to dariyaon ka paani bhi utarne ko hai
apni ankhon men vahi aks liye phirte hain
jaise aina-e-maqsum sanvarne ko hai
jo duboegi na pahunchaegi sahil pe hamen
ab vahi mauj samundar se ubharne ko hai
kunj-e-tanhai men khilta hai takhayyul mera
aur main khush huun ki ye gul phir se nikharne ko hai
Leave a Reply