Irfan Sattar
na fasle ko na raḳht-e-safar ko dekhte hain
ajiib ranj se divar-o-dar ko dekhte hain
na jaane kis ke bichhaḌne ka ḳhauf hai un ko
jo roz ghar se nikal kar shajar ko dekhte hain
ye roz-o-shab hain ibarat usi tavazun se
kabhi hunar ko kabhi apne ghar ko dekhte hain
tu is qadar bhi tavajjoh pe ḳhush-guman na ho
tujhe nahin tiri tab-e-nazar ko dekhte hain
firaq ham ko mayassar bhi hai pasand bhi hai
pe kya karen ki tiri chashm-e-tar ko dekhte hain
ham ahl-e-hirs-o-havas tujh se be-niyaz kahan
dua ke ba.ad dua ke asar ko dekhte hain
ye be-sabab nahin sauda ḳhala-navardi ka
musafiran-e-adam rahguzar ko dekhte hain
vo jis taraf ho nazar us taraf nahin uThti
vo ja chuke to musalsal udhar ko dekhte hain
hamen bhi apna muqallid shumar kar ‘ghalib’
ki ham bhi rashk se tere hunar ko dekhte hain
Leave a Reply