na hui ham se shab basar na hui
kis se puchhen ki kyuun sahar na hui
vo nazar-shoḳh-o-fitna-za hi sahi
kyuun mire hal-e-zar par na hui
bazm men ye ada hamen samjhe
sab ko dekha udhar nazar na hui
ai mira haal puchhne vaale
tujh ko ab tak miri ḳhabar na hui
ham isi zindagi pe marte hain
jo yahan chain se basar na hui
kaise kaise sitam hue tujh par
kyuun mire dil tujhe ḳhabar na hui
ruuh aalam men phunk di to kya
meri janib to ik nazar na hui
uf mire gham-kade ki tariki
aap aa.e bhi to sahar na hui
dil ne duniya na.i bana Daali
aur hamen aaj tak ḳhabar na hui
mujh se ruḳhsat hui thi jab duniya
tum kahan the tumhen ḳhabar na hui
hijr ki raat kaTne vaale
kya karega agar sahar na hui
ḳhush rahen vo ye mudda.a tha ‘aziz’
na hui zindagi basar na hui
Leave a Reply