Teri Tahaarat Ko Shaikh Kah Tu Kahan Se Laen Ek Aab-E-Ju Hum

tiri taharat ko shaikh kah tu kahan se laaen ik ab-e-ju ham

tavaf-e-dil ka hai qasd ham ko karen hain aansu se nit vazu ham

ba-tang aae hain zindagi se rahenge khauf-e-fana men kab tak

jo honi ho so shitab hove khade hain qatil ke ru-ba-ru ham

rakhe tu jab tak jahan men ya-rab tire karam se umiid ye hai

rahe na mutlaq talash-e-daulat karen na duniya ki justuju ham

khizan ne sab ki bahar kho di raha na sumbul bachi na raihan

gulon ko dekha hue pareshan chaman se nikle ba-rang-e-bu ham

gham-o-alam ne to kar rakha hai hamare chehre ko zard ‘joshish’

lahu ke aansu agar na roen na hon mohabbat men surkh-ru ham

Leave a Comment