Parda-E-Zehn Se Saya Sa Guzar Jata Hai

parda-e-zehn se saaya sa guzar jaata hai

jaise pal bhar ko mira dil bhi thahar jaata hai

teri yadon ke diye jab bhi jalata hai ye dil

husn kuchh aur shab-e-gham ka nikhar jaata hai

hasraten dil ki mujassam nahin hone patin

khvab banne nahin paata ki bikhar jaata hai

raat bhige to ik anjan sa benam sa dard

chandni ban ke fazaon men bikhar jaata hai

raat kaate nahin katti hai kisi surat se

din to duniya ke bakhedon men guzar jaata hai

us ko bhi kahte hain ‘mumtaz’ vafa ka naghma

dil-e-betab men ghut ghut ke jo mar jaata hai

Leave a Comment