Dipak Prajapati Khaalis
bin koi jurm kiye pahle saza dete hain
phir vahi log riha.i ki dua dete hain
jab kabhi hosh men aane ki talab hoti hai
tab mire yaar mujhe jam ke pila dete hain
yuun to mushkil hai bahut dard batana sab ko
so yahi soch ke ham sher suna dete hain
ḳhali vaqton ko bitane ke liye ham aksar
bas tire naam ko likhte hain miTa dete hain
apne hi taur tariqon ke qalandar hain ham
chahen to shaah ki ninden bhi uḌa dete hain
shaam hote hi chale aate hain kuchh farzi ḳhayal
kya mire lafz unhen ghar sa maza dete hain
ham pe jab ishq jatane ka saval aata hai
ham tiri maang men sindur saja dete hain
Leave a Reply