dil-o-nazar men na paida hui shakeba.i
kisi ke gham ne tabi.at hazar bahla.i
tamam husn-o-mohabbat tamam ra.ana.i
vo ik nigah jo paigham-e-zindagi laa.i
chhalak paḌen na kahin ashk meri ankhon se
kisi ke dard-e-mohabbat ki ho na rusva.i
gham-e-zamana ke maare na rah sake zinda
nigah-e-dost ne kya kya na ki masiha.i
na ruk sakenge rah-e-ishq men junun ke qadam
ki baḌh raha hai abhi zauq-e-abla-pa.i
vo jehd-e-jama-dari hai na fikr-e-baḳhiya-gari
ajiib haal men hain aaj tere sauda.i
nazar paḌa na kahin vo ghazal-ram-ḳhurda
junun-e-shauq ne ki laakh dasht-paima.i
miri tarah to tamasha na ban saka koi
agarche ek jahan tha tira tamasha.i
qarib aa ke bhi ehsas-e-buad miT na saka
ki tere ho ke bhi ham hain tire tamanna.i
jo hirs-o-az ke bande hain un ko kya malum
vaqar-e-bandagi-o-azmat-e-jabin-sa.i
har ek chiiz jahan sim-o-zar men tulti hai
mire ḳhulus ki kya ho vahan pazira.i
ye lala-o-gul-o-nasrin ye anjum-o-mahtab
kahan nahin tire jalvon ki alam-ara.i
mujhe vo ahd vo din-rat yaad aate hain
ki jab na thi tire gham se koi shanasa.i
shab-e-firaq ki be-tabiyon ko kya kahiye
kabhi kabhi to mire gham ko bhi hansi aa.i
na rah saka kisi aalam men bhi tira ‘muztar’
ki gham hua na gavara ḳhushi na raas aa.i
Leave a Reply