Imam Bakhsh Nasikh
sab ki sab kya hain shab-e-qadr hamari raten
katti hain ankhon hi men hijr ki saari raten
haae kya pyaar se sote the lipat kar ai jaan
yaad har dam mujhe aati hain vo pyari raten
donon zulfon men hain khurshed se taban aariz
roz-e-raushan ke barabar hain tumhari raten
jo ghadi hai nazar aati hai mujhe ek pahad
hain ghazab furqat-e-mahbub ki bhari raten
hijr men subh se ta-sham bajae shabnam
meri ankhon se lahu rakhti hain jaari raten
sun pade rahte hain be-yar andhere men ham
hain shab-e-gor ke manind hamari raten
shab-e-tarik judai men ye chillata huun
diq bahut karti hain ya-hazrat-e-bari raten
teri zulfon ke liye shana-ba-kaf hai har din
aur karti hain tiri aina-dari raten
fasl-e-gul men vo gul-e-tar nahin gul kar de charagh
ki siyah chahiyen ai bad-e-bahari raten
murgh-e-zarrin-e-falak par hai yaqin-e-khuffash
kis qadar mere dinon men huiin saari raten
din ke badle bhi yahi aati hain gham-khvari ko
mujh se rakhti hain bahut hijr men yaari raten
din to ‘nasikh’ ke ba-har-hal guzar jaate hain
par judai men bahut laati hain khvari baten
Leave a Reply