Poet
rakho vo sheva na madd-e-nazar nazar men rahe
ki jis se raz-e-mohabbat bashar bashar men rahe
chaman jo ban ke tira rahguzar guzar men rahe
to nakhl-e-tur ka jalva shajar shajar men rahe
aziiz tar hai agar ho sarishk men tasir
latif-tar hai jo ab-e-guhar guhar men rahe
udhar tamam kiya asman ne apna kaam
idhar phanse hue ahl-e-hunar hunar men rahe
vufur-e-gham se ye ji men hai roiye is tarah
na dil men haal na khun-e-jigar jigar men rahe
buri khabar ho to is tarah nama-bar kahna
ki sidq-o-kizb ka shak be-khabar khabar men rahe
samajh ke ishq kar ai dil ki kya nahin maalum
jo sochte nahin naf-o-zarar zarar men rahe
uthao qabr men bhi lazzat-e-khalish ta-hashr
khuda kare ki khadang-e-jigar jigar men rahe
vafa hamari sitam aap ke kuchh aise hon
ki muddaton yahi charcha bashar bashar men rahe
shab-e-firaq mili tira-rozgari men
sahar guzar gai aur ham sahar men rahe
ham un ki bazm men baithe rahe va-lekin yuun
ki jaise rahrav-e-rah-e-khatar khatar men rahe
khiche jo siine se naala to chahiye ai dil
misal-e-maani-e-lafz-e-asar asar men rahe
shab-e-visal ki yarab na raushni kam ho
vo nur-e-ariz-e-rashk-e-qamar qamar men rahe
tamiz gham ko diya tha falak ne aish itna
ki jaise jalva-e-rang-e-sharar sharar men rahe
hamare qatl ko lo nazuki se pahle salah
abhi to khanjar-e-zeb-e-kamar kamar men rahe
ada-e-sharm men lakhon ishare hain ‘salik’
jhuki hui ye kisi ki nazar nazar men rahe
Leave a Reply