kabhi na asuda-e-amal ho magar irada bhi kam nahin hai
aur is irade ka unchi avaz men i.aada bhi kam nahin hai
shahanshah-e-vaqt aur darbari apne suud o ziyan se vaqif
sarir-ara-e-saltanat koi ḳhanvada bhi kam nahin hai
asa-e-farman-rava.i jaadu jaga.e jis taur bhi rava hai
rumuz-e-asrar-e-hukmarani men shahzada bhi kam nahin hai
koi rakhe be-jahat safar men masafaton ka hisab kaise
ki tausan-e-be-zamam ko be-nishan jaada bhi kam nahin hai
yahi bahut hai kisi tarah se bharam hi rah jaa.e pesh duniya
agar mayassar nahin hai baada ḳhayal-e-bada bhi kam nahin hai
mujh aise uftad-gan ki Dharas na jaane kaise bandhi hui hai
pahaḌ si umr kaTne ko ye zehn-e-sada bhi kam nahin hai
kisi ka khoTa nasib ‘yasir’ kise ḳhabar kis ghaḌi khara ho
julus-e-shahi ke saath ik be-zaban piyada bhi kam nahin hai
Leave a Reply