Arsh Sahbai
ye aa.ina tha magar gham ki rahguzar men tha
aTa hua mira dil dard ke ghubar men tha
qadam qadam pe ka.i rang ke the hangame
ajiib lutf sitam-ha-e-rozgar men tha
na kar saka main faramosh us ki koi baat
mira ḳhayal ki ye mere iḳhtiyar men tha
junun ke dasht men paiham bhaTak raha tha dil
magar ye zehn haqa.eq ke kar-zar men tha
gira jo palkon se ik ashk kah gaya sab kuchh
kahan fasane men jo lutf iḳhtisar men tha
khule hue the ka.i maslahat ke darvaze
magar ye dil tha ki Duuba hua vaqar men tha
kise pukarte ham rah-e-zindagi men ‘arsh’
har ek shaḳhs ḳhud apne hi intizar men tha
Leave a Reply