Hue Hain Gum Jis Ki Justuju Mein Usi Ki Hum Justuju Karenge

hue haiñ gum jis kī justujū meñ usī kī ham justujū kareñge

rakkhā hai mahrūm jis ne ham ko usī kī ham aarzū kareñge

ga.e vo din jab ki is chaman meñ havā-e-nashv-o-numā thī ham ko

ḳhizāñ ko dekhā nahīñ hai ham ne ki ḳhvāhish-e-rañg-o-bū kareñge

hikāyat-e-ārzū hai nāzuk zabān kyā ḳhaak kah sakegī

lab-e-ḳhamosh-o-nigāh-e-hasrat se dil kī ham guftugū kareñge

jagah jo āñkhoñ meñ maiñ ne dī thī to un se thī chashm-e-rāz-dārī

ye kyā ḳhabar thī ki ashk mere mujhī ko be-ābrū kareñge

abhī to gum-karda-rāh ḳhud haiñ mai-e-mohabbat kī be-ḳhudī meñ

agar kabhī aap meñ ham aa.e to us kī bhī justujū kareñge

us anjuman meñ ki chashm-e-sāqī kafīl ho aish-e-zindagī kī

vo bāda-ḳhvārī meñ ḳhaam hoñge jo fikr-e-jām-o-subū kareñge

tahārat-e-zāhirī se hāsil na ho sakegī safā-e-bātin

bahā ke ham ḳhūn-e-tauba ‘vahshat’ usī se ik din vuzū kareñge

Leave a Comment