Wahshat Raza Ali Kalkatvi
hue hain gum jis ki justuju men usi ki ham justuju karenge
rakkha hai mahrum jis ne ham ko usi ki ham aarzu karenge
ga.e vo din jab ki is chaman men hava-e-nashv-o-numa thi ham ko
ḳhizan ko dekha nahin hai ham ne ki ḳhvahish-e-rang-o-bu karenge
hikayat-e-arzu hai nazuk zaban kya ḳhaak kah sakegi
lab-e-ḳhamosh-o-nigah-e-hasrat se dil ki ham guftugu karenge
jagah jo ankhon men main ne di thi to un se thi chashm-e-raz-dari
ye kya ḳhabar thi ki ashk mere mujhi ko be-abru karenge
abhi to gum-karda-rah ḳhud hain mai-e-mohabbat ki be-ḳhudi men
agar kabhi aap men ham aa.e to us ki bhi justuju karenge
us anjuman men ki chashm-e-saqi kafil ho aish-e-zindagi ki
vo bada-ḳhvari men ḳhaam honge jo fikr-e-jam-o-subu karenge
taharat-e-zahiri se hasil na ho sakegi safa-e-batin
baha ke ham ḳhun-e-tauba ‘vahshat’ usi se ik din vuzu karenge
Leave a Reply