roke se kahin hadsa-e-vaqt ruka hai
sho.alon se bacha shahr to shabnam se jala hai
kamra kisi manus si ḳhushbu se basa hai
jaise koi uTh kar abhi bistar se gaya hai
ye baat alag hai ki main jiita huun abhi tak
hone ko to sau baar mira qatl hua hai
phulon ne chura li hain mujhe dekh ke ankhen
kanTon ne baḌi duur se pahchan liya hai
us samt abhi ḳhuun ke pyase hain hazaron
is samt bas ik qatra-e-ḳhun aur bacha hai
rudad-e-charaghan to bahut ḳhuub hai lekin
kya janiye kis kis ka lahu in men jala hai
is rang-e-taghazzul pe ‘ali’ chhap hai meri
ye zauq-e-suḳhan mujh ko virasat men mila hai
Leave a Reply