Mohsin Naqvi
ma.arka ab ke hua bhi to phir aisa hoga
tere dariya pe miri pyaas ka pahra hoga
us ki ankhen tire chehre pe bahut bolti hain
us ne palkon se tira jism tarasha hoga
kitne jugnu isi ḳhvahish men mire saath chale
koi rasta tire ghar ko bhi to jaata hoga
main bhi apne ko bhula.e hue phirta huun bahut
aa.ina us ne bhi kuchh roz na dekha hoga
raat jal-thal miri ankhon men utar aaya tha
surat-e-abr koi TuuT ke barsa hoga
ye masiha.i use bhuul ga.i hai ‘mohsin’
ya phir aisa hai mira zaḳhm hi gahra hoga
Leave a Reply