andar se muntashir huun ki bahar shikasta hai
main ḳhud shikasta huun ki mira ghar shikasta hai
har shai ke ḳhal-o-ḳhad hain mire ḳhuun men muntashir
har jism mere jism ke andar shikasta hai
nikla tha kis ki naav men sahil ke chaav men
ab tak huun main bahav men langar shikasta hai
ik sang se hai fikr-e-arastu sharar-numa
ik aa.ine men aks-e-sikandar shikasta hai
ik mahviyat ki hairat-e-sahil hai har taraf
ik kaifiyat ki saara samundar shikasta hai
ya shisha-e-nigah hi mila mujh ko chur-chur
ya shisha-e-jihat men ye manzar shikasta hai
‘kausar’ badal ga.e hain parastish ke za.iqe
mehrab sar-ḳhamida hai mimbar shikasta hai
Leave a Reply