Pawan Kumar
hairat hai jinhen meri taraqqi pe jalan bhi
hain un men na.e dost bhi yaran-e-kuhan bhi
hoti thi kabhi mahfil-e-ahbab men raunaq
taari hai vahan ab to udasi bhi ghuTan bhi
saath us ka nibhata huun to ye mera hunar hai
vo shaḳhs ba-yak-vaqt hai paani bhi agan bhi
hanste hue chehre pe bhi aati hai udasi
hai chand ki taqdir men thoḌa sa gahan bhi
is rah-e-mohabbat ki hai itni si kahani
is raah men aa.e hain bayaban bhi chaman bhi
manzil ke liye mujh ko mile hain jo sharare
shamil hai unhin men mire pairon ki thakan bhi
be-nam se kuchh dard yahan Thahre hue hain
hai ek sara.e ki tarah apna badan bhi
ab tark-e-ta.alluq ka asar donon taraf hai
sharminda jo tu hai to pasheman hai ‘pavan’ bhi
Leave a Reply