chaman apne rang men mast hai koi gham-gusar-e-digar nahin
ki hai shabnam ashk-fishan magar gul-e-tar ko koi ḳhabar nahin
gham-e-zindagi ka ilaaj to kabhi maut se bhi na ho saka
ye vo saḳht qaid-e-hayat hai kisi tarah jis se mafar nahin
mire paas jo bhi tha luT gaya na vo main raha na vo dil raha
kisi aur shai ka to zikr kya ki ab aah men bhi asar nahin
ye tasavvurat ki vus.aten ye taḳhaiyyulat ki rif.aten
vahan jalve dekh raha huun main jahan iḳhtiyar-e-nazar nahin
tire husn ka ye kamal hai ki ḳhud aap apni misal hai
vo jamal hi to jamal hai jo kisi ka aks-e-nazar nahin
jo hain be-amal vo hain ba-amal jo hain be-hunar vo hain ba-hunar
ajab inqilab-e-zamana hai kahin qadr-e-ahl-e-hunar nahin
mujhe ai ‘figar’ na mil saka koi lamha sub.h-e-nashat ka
miri zindagi hai vo sham-e-gham ki jo rushanas-e-sahar nahin
Leave a Reply