poet

Mujhko Duniya Ki Tamanna Hai Na Din Ka Lalach

mujh ko duniya ki tamanna hai na diin ka lalach

haae lalach hai to ik mah-jabin ka lalach

ishq-bazi pe suna mujh ko malamat na karo

haif hai jis ko na ho tum se hasin ka lalach

halat-e-qalb sar-e-bazm bataun kyunkar

parda-e-dil men hai ik parda-nashin ka lalach

jab yahin taish men guzre to vahan kya ummid

na raha is liye ham ko to kahin ka lalach

boriya takht-e-sulaiman se kahin behtar hai

ham gharibon ko nahin taj-o-nagin ka lalach

na main duniya ka talabgar na uqba ki havas

asmanon ki tamanna na zamin ka lalach

dil bhi do jaan bhi do zar bhi do us ko ‘parvin’

badh gaya sab se mire mah-jabin ka lalach

More Poems

Leave a Comment