mire dil ko mohabbat ḳhuub garma.e to achchha ho
ḳhalish baḌh kar ilaj-e-dard ban jaa.e to achchha ho
mire ashk-e-mohabbat se dilon ke mail dhul jaa.en
mira gham zindagi ke kaam aa jaa.e to achchha ho
har ik mazlum ko meri himayat ka sahara ho
mira zauq-e-amal us raah par aa.e to achchha ho
mire soz-e-darun se jagmaga.e hasti-e-alam
mira nur-e-basirat aam ho jaa.e to achchha ho
andheri shab hai sham-e-dil farozan kijiye yaaro
sitaron ki chamak kuchh aur baḌh jaa.e to achchha ho
zaban par baat bhule se na aa.e shikva-e-dil ki
taghaful par kabhi un ke na harf aa.e to achchha ho
haqiqat ḳhud ko manva le zaban-e-be-zabani se
ḳhud un ka dil nigahon se jo sharma.e to achchha ho
miri bechainiyon ko chain kuchh to aa hi ja.ega
tabib-e-ishq mujh ko dekhne aa.e to achchha ho
unhen ranginiyon se ik shaghaf ai ‘taj’ rahta hai
miri bechainiyon men rang bhar jaa.e to achchha ho
Leave a Reply