Ahmad Zafar
zahr ko mai na kahun mai ko gavara na kahun
raushni maang ke main khud ko sitara na kahun
apni palkon pe liye phirta huun chahat ke sarab
dil ke sahra ko samundar ka kinara na kahun
hijr ke phuul men vo chehra-e-zarrin dekhun
vasl ke khvab ko milne ka ishara na kahun
marte marte bhi ye tahrir amanat meri
maut ke baad bhi jiine ko khasara na kahun
apni takmil ke har naqsh men dekhun us ko
arsa-e-dahr ko hasrat ka nazara na kahun
hashr se pahle mire hashr ki tasvir na ban
harf-e-akhir ko kisi taur dobara na kahun
zindagi jis ki mire dam se ibarat ho ‘zafar’
kyuun kahe koi use jaan se pyara na kahun
Leave a Reply