Pursish Hai Chashm-e-Ashk-e-Fasha Par Na Aae Harf

Abdul Mannan Tarzi

pursish hai chashm-e-ashk-e-fasha. par na aae harf

duben bhi ham to sail-e-ravan par na aae harf

donon hi apni apni jagah la-javab hain

apne yaqin pe un ke guman par na aae harf

ai rashk itna vahm-o-guman bhi baja nahin

ehsas-e-qurbat-e-rag-e-jan par na aae harf

dil na-murad shoala-e-ariz se jal gaya

darte the ham ki soz-e-nihan par na aae harf

hushiyar bazm-e-ghair men naam un ka aa na jaae

ai naghma-sanj josh-e-bayan par na aae harf

tir-e-nigah dil men tarazu hua to ho

ab tere abruon ki kaman par na aae harf

ham un ke ru-ba-ru rahe is maslahat se chup

mahfil men apne ijz-e-bayan par na aae harf

ud jaae tegh se to rahe sarfaraz sar

kat jaae baat par to zaban par na aae harf

is kashmakash men teri gali se pare rahe

aae kahan pe harf kahan par na aae harf

‘tarzi’ tavaf-e-khana-e-khali se khush nahin

bas jaao tum to dil ke makan par na aae harf