Ammar Yasir Migsi
ik sanvle badan se mohabbat qubul kar
ai rabb-e-ishq dil ki shahadat qubul kar
ankhon se meri us ke dupaTTe tak aaya hai
ai rabb-e-dard ashk ki hijrat qubul kar
sahra agar nahin hai to sahra se kam nahin
ai rabb-e-qais qalb ki vahshat qubul kar
dil ne abhi bicha.i hai ja-e-namaz-e-ishq
luknat-zada zaban ki iqamat qubul kar
main ne namaz chhoḌ ke ik jaan bacha.i hai
ma.abud-e-lam-yazal ye ibadat qubul kar
Leave a Reply