bahar aati hai lekin sar men vo sauda nahin hota
har aahaT par tiri avaz ka dhoka nahin hota
tira gham ho to aa jaa.e saliqa muskurane ka
ki har azar-e-jan sha.ista-e-duniya nahin hota
nishan kunj-e-tarab ka kohsar-e-gham se milta hai
bhaTak jaata huun main jab raah men dariya nahin hota
yahi surat to har-su kucha-o-bazar men bhi hai
jahan vahshat barasti ho vahin sahra nahin hota
ik a.ina bahar-surat pas-e-a.ina hota hai
jo chamke abgine men vahi chehra nahin hota
use ye ḳhushnuma duniya kabhi achchhi nahin lagti
kisi masraf ka kar-e-dida-e-bina nahin hota
bahana tujh se milne ka ye tanha.i ne DhunDa hai
sar-e-mahfil kisi ko diid ka yaara nahin hota
jo di hain ne.amaten yarab to phir haqq-e-tasarruf de
nazar apni dimagh apna hai dil apna nahin hota
zara kuchh shaghl-e-neko-kar bhi ‘sayyad-amin-ashraf’
faqat nam-o-nasab se aadmi achchha nahin hota
Leave a Reply