Dil Mein Rahna Hai Pareshan KHayalon Ka Hujum

dil meñ rahnā hai pareshān ḳhayāloñ kā hujūm

aur āñkhoñ meñ qayāmat kā samāñ rahtā hai

ishq ke raaz ko jitnā meñ nihāñ rakhtā huuñ

ḳhāmushī se mirī utnā hī ayaañ rahtā hai

rotā rahtā huuñ kisī ġham-zada ke rone par

aur dil-e-markaz-e-ālām jahāñ rahtā hai

rif.at-e-fikr hai hāsil mujhe ulfat ke tufail

jo na ye ho to kahāñ husn-e-bayāñ rahtā hai

lāla-kārī kā salīqa bhī nigah ko aayā

āñsuoñ kī jagah ab ḳhuun ravāñ rahtā hai

kashtī-e-zīst hai girdāb-e-balā meñ ‘sā.ib’

āj-kal nām-e-ḳhudā vird-e-zabāñ rahtā hai

Leave a Comment