Imran Rahib
phir yuun hua ki aag se chehra jala diya
kis ne aziim shahr ka naqsha jala diya
kal panchhiyon ne qaid men ik faisle ke ba.ad
badle ki sard aag se pinjra jala diya
tavan jo nahin mila shah-rag ko kaaT kar
bachche ki laash phenk di basta jala diya
andhi ki phir charagh se takrar ho ga.i
jugnu ne kyuun hava ka dupaTTa jala diya
jab nainva men raat thi aur bujh ga.e charagh
tab ashqiya ne ḳhauf se ḳhema jala diya
ye gir rahi hai raakh jo ‘rahib’ zamin par
buḌhiya ne raat chand men charḳha jala diya
Leave a Reply