balaen ankhon se un ki mudam lete hain
ham apne hathon ka mizhgan se kaam lete hain
ham un ki zulf se sauda jo vaam lete hain
to asl o suud vo sab daam daam lete hain
shab-e-visal ke roz-e-firaq men kya kya
nasib mujh se mire intiqam lete hain
qamar hi dagh-e-ghulami faqat nahin rakhta
vo mol aise hazaron ghulam lete hain
ham un ke zor ke qaail hain hain vahi shah-zor
jo ishq men dil-e-muztar ko thaam lete hain
qatil-e-naz batate nahin tujhe qatil
jab un se puchho ajal hi ka naam lete hain
tire asiir jo sayyad karte hain fariyad
to phir vo dam hi nahin zer-e-dam lete hain
jhukae hai sar-e-taslim mah-e-nau par vo
ghurur-e-husn se kis ka salam lete hain
tire khiram ke pairu hain jitne fitne hain
qadam sab aan ke vaqt-e-khiram lete hain
hamare haath se ai ‘zauq’ vaqt-e-mai-noshi
hazar naaz se vo ek jaam lete hain