Waseem Barelvi
haveliyon men miri tarbiyat nahin hoti
to aaj sar pe tapakne ko chhat nahin hoti
hamare ghar ka pata puchhne se kya hasil
udasiyon ki koi shahriyat nahin hoti
charagh ghar ka ho mahfil ka ho ki mandir ka
hava ke paas koi maslahat nahin hoti
hamen jo khud men simatne ka fan nahin aata
to aaj aisi tiri saltanat nahin hoti
‘vasim’ shahr men sachchaiyon ke lab hote
to aaj khabron men sab khairiyat nahin hoti
Leave a Reply