shad-azimabadi

Kya Faqat Talib-E-Didar Tha Musa Tera

kya faqat talib-e-didar tha muusa tera

vahi shaida tha tira main nahin shaida tera

dida-e-shauq se be-vajh hai parda tera

kis ne dekha nahin in ankhon se jalva tera

khud nazakat pe na kyuun bojh ho parda tera

kya kisi aankh ne dekha nahin jalva tera

mit gai shorish-e-tufan-e-havadis ai mauj

ab vahi tu vahi bahta hua dariya tera

chain se shahr-e-khamoshan men har ik sota hai

aasra sab ko hai ai vada-e-farda tera

manzilat ek ki bhi hogi na vaisi ba-khuda

hashr men aaega jis shaan se rusva tera

zindagi kahti hai arman koi ab hai na ummid

kab talak saath karun main tan-e-tanha tera

be-sabab meri khamoshi nahin ai shahid-e-husn

daman-e-sabr se Dhankta nahin parda tera

yuun hababon ka na dil tod khuda-ra ai mauj

inhin qatron ke to milne se hai dariya tera

vahi rangat vahi khushbu vahi nazuk-badani

phuul ne naqsh utara hai sarapa tera

tujh se milne ka jo hai shauq to dar dar na phire

paanv tode hue baitha rahe shaida tera

ai gul aati hai khizan baagh men thahra na mujhe

dekhun in ankhon se utra hua chehra tera

kaash zahid rukh-e-raushan se utha len vo naqab

phir to kuchh rind ki rindi hai na taqva tera

apne mai-khane se ghabra ke main bahar aaya

jab haram se koi nikla na shanasa tera

us pe kya zor bhala jis pe ho us ka qaabu

chashm-e-shauq apni sahi dil to hai shaida tera

justuju shart hai mil jaega ziina bhi zarur

samne hai nazar-e-shauq ke mukhda tera

vusaat-e-qudrat-e-haq hogi na mahdud kabhi

nahin milne ka sira zulf-e-chalipa tera

bazm-e-akhir hai taqaza na kar ai mahfil-e-shauq

ab kahan saaf bhala saghar o sahba tera

‘shad’ ghazlen nahin ayat-e-zubur in ko samajh

lahn-e-daud se kuchh kam nahin naghma tera

ab javani ki umangen na umangon ki khushi

‘shad’ ko hai faqat ai mauj sahara tera

More Poems

Leave a Comment