yuun to in ankhon se ham ne o but kahne ko duniya dekhi
lekin saari khudai bhar teri surat-e-yakta dekhi
khel gae kyuun jaan pe ‘anjum’ tum ne abhi kya duniya dekhi
marne lage khuban-e-jahan par teri meri dekha-dekhi
dard-e-jigar kam tha ki nahin tha ye to bata dam tha ki nahin tha
kah to mariz men kuchh bhi dekha nabz jo tu ne masiha dekhi
us ko bhala kyunkar chain aaya dil ko kya kah kar samjhaya
surat teri jis ne sitam-gar thaam ke apna kaleja dekhi
vasl ki shab barham hi raha vo ta-ba-sahar uljha hi kiya vo
bal na gaya abru se us ki zulf bhi ham ne suljha dekhi
vah-re-va ai nala-e-sozan dekh li teri thandi garmi
dil na pasija us kafir ka aag bhi tu ne bhadka dekhi
us ke dil se gai na kudurat dil ki dil hi men rah gai hasrat
ham ne jhadi ashkon ki barson in ankhon se barsa dekhi
ek zara se hashr pe vaaiz us ko darata allah allah
jis ne buton ki gali men barson roz-e-qayamat barpa dekhi
jaisi ziist hamari guzri dushman ki bhi yuun na basar ho
‘anjum’ hazrat-e-dil ki badaulat ham ne musibat kya kya dekhi
Leave a Reply