Mubarak Azimabadi
begana-e-vafa tira sheva hi aur hai
ahl-e-vafa ka taur-tariqa hi aur hai
dair o haram ki raah men rakhte nahin qadam
ham rah-ravan-e-shauq ka rasta hi aur hai
dil bevafa ke haath na bechega ba-vafa
tum se nahin banega ye sauda hi aur hai
allah dil na tum ko tadapta hua dikhae
dekha na jaega ye tamasha hi aur hai
jalva-farosh aap hain main dil-farosh huun
aison se kya banega ye sauda hi aur hai
tukde hain dil jigar ke ‘mubarak’ ki sher hain
ghazlon ka aap ki to safina hi aur hai
Leave a Reply