mahfil men us pe raat jo tu mehrban na tha
aisa subuk tha ghair ki kuchh bhi giran na tha
vasl-e-butan men ḳhauf-e-firaq-e-butan na tha
goya ki apne sar pe kabhi asman na tha
pesh-e-raqib pursish-e-dil tum ne ḳhuub ki
dushman tha parda-dar na tha raz-dan na tha
ibrat dila chuki thi hamari sitam-kashi
mutlaq shab-e-visal adu shadman na tha
bigḌe hue raqib se vo aa.e mere ghar
is husn-e-ittifaq ka koi guman na tha
sargarm-e-nala kyuun rahi bulbul bahar men
kya ham na the asiir ki zauq-e-fughan na tha
sarshar-e-be-ḳhudi the ‘asar’ bazm-e-yar men
kya janen ham raqib kahan tha kahan na tha
Leave a Reply