sarab-e-shab bhi hai khvab-e-shikasta-pa bhi hai
ki niind mangte rahne ki kuchh saza bhi hai
tamam umr chunungi main reza reza tujhe
pas-e-ghubar-e-nigah ek aina bhi hai
supurd-e-raqs kiya main ne har tamanna ko
lahu ke shor ki ab koi intiha bhi hai
main kyuun na ek hi qatre se sair ho jaun
kisi ki pyaas ko dariya kabhi mila bhi hai
miyan-e-rah kadi dhuup men na chhod mujhe
bata to de ki kahin ghar ka rasta bhi hai
main is charagh ko dushman ki saf men kyuun rakhkhun
ye mere naam pe kuchh der ko jala bhi hai
hazar lazzat-e-khamosh ke nashe men ho dil
sukhan ke naam pe kuchh harf mangta bhi hai
mire khilaf gavahon ki kuchh kami bhi nahin
magar har ek mire haq men bolta bhi hai
simat ke rah gae divar-e-shahr-e-khauf men log
kise khabar ho ki zinda koi bacha bhi hai
hujum-e-tishna-laban ka suragh de mujh ko
virasaton men miri dasht-e-karbala bhi hai