koi bhi rasm ho kuchh ho bahana hota tha
na jaane kya tha ki milna milana hota tha
kisi se milte agar dil se ho ke milte the
ajiib log the kaisa zamana hota tha
vo laḌ-jhagaḌ ke bhi ik dusre pe marte the
ye sab to tha hi magar ana-jana hota tha
koi bhi toḌ nahin ahd-e-yad-e-mazi ka
hazar gham the magar muskurana hota tha
ye tarbiyat thi gharon men har ek beTi ko
kisi bhi haal men ho ghar bachana hota tha
varaq varaq the kitabon ke mo’atabar itne
har ek lafz ko dil men basana hota tha
agar tha ishq to is men bhi aisi shiddat thi
bhanvar men aise hi bas kuud jaana hota tha
Leave a Reply