naza.a men ab mire jiine ki dua karte hain
meri jaan aap pe qurban ye kya karte hain
kaisi dil-gir hai rudad-e-mohabbat ai dost
ham kaha karte hain aur log suna karte hain
mai-parasti koi bid.at nahin ham to ai shaiḳh
sunnat-e-‘hafiz’-o-‘ḳhayyam’ ada karte hain
jaur-e-mahbub ka hota ho kahin zikr to ham
ban ke anjan tavajjoh se suna karte hain
marg-e-bimar-e-mohabbat to koi baat nahin
aap ko rashk-e-masiha bhi kaha karte hain
Leave a Reply