hirs-o-havas ke naam ye din raat ki talab
imdad ki umiid mafadat ki talab
vo sanehe ki soch badalni paḌi mujhe
paida.eshi nahin thi ḳhayalat ki talab
main bhi kisi masiha ke huun intizar men
tum ko bhi ghaliban hai karamat ki talab
ḳhabron men ek lutf ka pahlu to hai magar
achchhi nahin hai itni bhi halat ki talab
kaisa ajiib rog mire ji ko lag gaya
har vaqt hai kisi se mulaqat ki talab
jur.at se apni ḳhud bhi main hairan huun bahut
baḌhti hi ja rahi hai savalat ki talab
tu bhi gunahgar yaqinan hai zaat ka
‘saurabh’ tiri saza bhi vahi zaat ki talab
Leave a Reply