Hamdam Kashmiri
aks kya dida-e-tar men dekha
ham ne dariya ko bhanvar men dekha
sar-e-manzil koi manzil na mili
ik safar aur safar men dekha
nazar aaya kabhi bazar men ghar
kabhi rasta koi ghar men dekha
suraḳh-ru jang se lauT aaya tha
ḳhuun men lat-pat jise ghar men dekha
jaane kab aa ke yahan baiThe the
apna saaya bhi shajar men dekha
ab bhi chipka hai miri ankhon men
jo dhuan sham.a sahar men dekha
aag kis des lagi hai ab ke
phir dhuan apne nagar men dekha
ek hi jast men ham ne ‘hamdam’
fasla dasht se dar men dekha
Leave a Reply