Abbas Tabish
kas kar bandhi gai ragon men dil ki girah to dhili hai
us ko dekh ke ji bhar aana kitni badi tabdili hai
zinda rahne ki khvahish men dam dam lau de uthta huun
mujh men saans ragad khati hai ya machis ki tiili hai
un ankhon men kudne vaalo tum ko itna dhyan rahe
vo jhilen payab hain lekin un ki tah pathrili hai
kitni sadiyan suraj chamka kitne dozakh aag jali
mujhe banane vaale meri mitti ab tak giili hai
zinda huun to mujhe bataen niile honton vaale log
mera kaisa rang karegi baat jo main ne pi li hai
mumkin hai ab vaqt ki chadar par main karun rafu ka kaam
juute main ne ganth liye hain guddi main ne si li hai
Leave a Reply