Riaz Majeed
chhupe hue the jo naqd-e-shu.ur ke Dar se
nikal sake na vo jazbat mere andar se
kabhi bhi shahr-e-tilismat-e-dil ki sair na ki
har ek jalva liya musta.ar bahar se
rahe ham apni hi gahra.iyon se na-vaqif
utar saki na kabhi kaa.i sat.h-e-dil par se
sukun ki jannaten dozaḳh nahin aziyyat ka
ajiib haal hua agahi ke mahshar se
hamari bachchon si ma.asumiyat hui zaḳhmi
lahuluhan hua dil ḳhirad ke patthar se
nazar se dekh lo ham ret ke gharondon ko
hamen na chhuo ki ham khokhle hain andar se
hamari koshish-e-be-sud us ko kya paati
husul jis ka tha mumkin faqat muqaddar se
‘riyaz’ shaam Dhali ab to ghar ko lauT chalo
tulu-e-sub.h se pahle ke nikle ho ghar se
Leave a Reply