bhaḌak uTThenge sho.ale ek din duniya ki mahfil men
kahan tak jazb hongi bijliyan sabr-azma dil men
lahu rone lagenge saz-e-ishrat chheḌne vaale
are ye dard avaz-e-shikast-e-shisha-e-dil men
ye chhinTen ḳhuun ki kaafi hain mere baḳhshavane ko
nazar aati hai jannat vus.at-e-daman-e-qatil men
abad tak kaukab-e-baḳht-e-sa.adat ban ke chamkenge
hue hain jazb jo qatre lahu ke tegh-e-qatil men
junun-e-be-sar-o-saman ki zinat dekhne vaale
mabada farq aa.e ishq ki tadbir-e-manzil men
hazaron saal soz-e-dil ne ki thi dozaḳh-ashami
qadam rakhte hi mere lag ga.i ik aag mahfil men
magar bhule nahin ho yaad ab tak ‘abr-o-‘hamid’ ki
‘aziz’ aḳhir vo quvvat kyuun nahin baaqi rahi dil men
Leave a Reply