ḳhvahish-e-divar-o-dar hai apna ghar hote hue
be-samar hain apni shaḳhon par samar hote hue
log saa.e aur shajar se is qadar bezar hain
shaḳh ko bhi kaTte hain shaḳh par hote hue
ik azab-e-ḳhauf-e-be-samti bhi in ankhon men hai
apni manzil aur apni rahguzar hote hue
ja.egi aḳhir kahan viran lamhon ki ye gard
mera ghar hote hue ya mera sar hote hue
be-sitara asman se raushni kya mangte
ik diya aur ek jugnu haath par hote hue
log ḳhamoshi se apne samne dekha kiye
mo’atabar baton ko bhi na-mo’tabar hote hue
Leave a Reply