Yusuf Taqi
mire bhi surḳh-ru hone ka ik mauqa.a nikal aata
gham-e-janan ke malbe se gham-e-duniya nikal aata
ye maana main thaka-hara musafir huun magar phir bhi
tumhare saath chalne ka koi rasta nikal aata
tiri yadon ki pathrili zamin shadab ho jaati
agar ankhon ke sahra se koi dariya nikal aata
chalo achchha hua Thahra na vo bhi aḳhir-e-shab tak
ki us ke ba.ad to phir sub.h ka taara nikal aata
kahan be-tab rakh sakta tha phir ehsas-e-mahrumi
dayar-e-ghair men tum sa koi apna nikal aata
rida-e-agahi ke bojh ne ḳham kar diya varna
hamara qad bhi phir tum se bahut uncha nikal aata
Leave a Reply