Abdullah Kamal
qadam qadam pe naya imtihan hai mere liye
ye shahr aaj bhi ik haft-khvan hai mere liye
nahin hai ab koi ehsas-e-roz-o-shab bhi mujhe
bas ek arsa-e-paikar-e-jan hai mere liye
na rahguzar-e-shajar-dar hai na ab-o-sahab
ye tez dhuup ye sahra-e-jan hai mere liye
main ik sitara huun us ke falak se tuuta hua
vo dhund hoti hui kahkashan hai mere liye
samet leti hai mujh ko main tuta-phuta sahi
ye raat khirqa-e-avargan hai mere liye
mahakte rahte hain khvabon men hijraton ke gulab
nai zamin naya asman hai mere liye
ubuur karna hai dariya-e-shor mujh ko ‘kamal’
aur ek kashti-e-be-badban hai mere liye
Leave a Reply